ကုလသမဂ္ဂကလေးသူငယ်များရန်ပုံငွေအဖွဲ့သည် ၁၉၅၀ ခုနှစ်မှစ၍ မြန်မာနိုင်ငံတွင် လုပ်ငန်းများ စဉ်ဆက်မပြတ် ဆောင်ရွက်ခဲ့ပါသည်။ နိုင်ငံရေး၊ စီးပွားရေး အခြေအနေများ ခက်ခဲကျပ်တည်းခဲ့သော်လည်း ကလေးများအတွက် ရေကျောက်ရောဂါ၊ အနာကြီးရောဂါ၊ Yaws အရေပြားရောဂါ ကင်းဝေးစေရေး အစီအစဉ်များကို အောင်အောင်မြင်မြင် အစပျိုးဆောင်ရွက်နိုင်ရန် ကူညီပံ့ပိုးပေးခဲ့ပါသည်။

ကုလသမဂ္ဂကလေးသူငယ်များ ရန်ပုံငွေအဖွဲ့သည် ကျေးလက်ကျန်းမာရေး ဝန်ဆောင်မှုများ ဖွံ့ဖြိုး တိုးတက်စေရေး၊ ကလေးများအတွက် အခြေခံပညာရေးနှင့် ပြည်သူလူထုအတွက် သောက်သုံးရေနှင့် မိလ္လာ စနစ်ရရှိစေရေး ပံ့ပိုးပေးနိုင်မည့် အစီအစဉ်များကို အချိန်နှင့်အမျှ တိုးချဲ့ဆောင်ရွက်ခဲ့ပါသည်။ မြန်မာနိုင်ငံကို ကလေးသူငယ် အခွင့်အရေးဆိုင်ရာ သဘောတူညီချက်နှင့် ၁၉၉၀ ခုနှစ် ကာလများတွင် နိုင်ငံတော်အစိုးရ သဘောတူလက်မှတ်ရေးထိုးခဲ့သော အမျိုးသမီးများအပေါ် အသွင်မျိုးစုံဖြင့် ခွဲခြားဆက်ဆံမှု ပပျောက်ရေး ဆိုင်ရာ သဘောတူညီချက်တို့တွင် ပါဝင်ဆောင်ရွက်နိုင်ရန် အထောက်အကူပေးခဲ့ပါသည်။ ကုလသမဂ္ဂကလေး သူငယ်များရန်ပုံငွေအဖွဲ့သည် မြန်မာ့ကလေးငယ်တို့၏ ဘဝများကို ကောင်းမွန် ပြောင်းလဲစေရေးအတွက် နှစ်ပေါင်း ၆၀ ကျော်ကာလပတ်လုံး ကြိုးပမ်းဆောင်ရွက်ပေးနေခဲ့ပါသည်။

ဆယ်စုနှစ်များစွာ နိုင်ငံတော်အစိုးရနှင့် ထဲထဲဝင်ဝင် လုပ်ငန်းဆောင်ရွက်ခြင်း သာမက အခြားအကျိုး ခံစားခွင့်ရှိသူများနှင့် အရေးပါသည့် ပူးပေါင်းဆောင်ရွက်ခြင်းတို့ဖြင့် ကလေးငယ်တို့၏ ဘဝကို မြှင့်တင် ပေးမည့် ကြိုးပမ်းဆောင်ရွက်မှုများ အားကောင်းခိုင်မာစေပြီး ရှေ့ဆက်လှမ်းနိုင်ရန် ဆောင်ရွက်လျက် ရှိပါသည်။ ဗဟိုချုပ်ကိုင်မှု ဖြေလျော့ခြင်းအပါအဝင် လက်ရှိဆောင်ရွက်နေသည့် နိုင်ငံရေး၊ စီးပွားရေး ပြုပြင်ပြောင်းလဲမှု လုပ်ငန်းစဉ်များသည် ကုလသမဂ္ဂကလေးသူငယ်များ ရန်ပုံငွေအဖွဲ့အတွက် အစိုးရနှင့်တကွ အခြားမိတ်ဖက်အဖွဲ့အစည်းများနှင့်အတူ လုပ်ငန်းများ ဆက်လက် ဆောင်ရွက်နိုင်စေပြီး ကလေးများအားလုံး အတွက် အဓိကကျသည့် တိုးတက်မှုများ ရရှိစေရန် အခွင့်အလမ်းကောင်းများ ဖန်တီးပေးပါသည်။

နိုင်ငံတော်အစိုးရ၏ သဘောတူညီချက်အရ လက်ရှိ ပြည်တွင်းလုပ်ငန်း အစီအစဉ် (၂၀၁၁-၂၀၁၇)ကို အခြားကုလသမဂ္ဂအဖွဲ့အစည်းများ၏ အစီအစဉ်များနှင့်အတူ ၂၀၁၅ ခုနှစ်တွင် သက်တမ်းတိုး ဆောင်ရွက် ခဲ့ပါသည်။ ၎င်းအစီအစဉ်သည် ကလေးသူငယ်များ (အထူးသဖြင့် အပယ်ခံကလေးငယ်များ)အတွက် ရလဒ် ကောင်းများကို ပိုမိုရရှိစေနိုင်မည့် ကဏ္ဍစုံ ပြုပြင်ပြောင်းလဲမှုများမှ ထွက်ပေါ်လာမည့့်် အသစ်သစ်သော အခွင့်အလမ်းကောင်းများကို လက်မလွတ်တမ်း ရယူအသုံးချနိုင်ရန်သာမက မူဝါဒရေးရာ၊ နည်းစနစ်ပိုင်းနှင့် ပြည်သူလူထုအကြား အဆင့်ဆင့်တိုင်းတွင် အရေးပါသည့် ရလဒ်ကောင်းများ ဆောင်ကြဉ်းပေးနိုင်ရန် ရည်ရွယ်ပါသည်။ အဆိုပါကိစ္စရပ်နှင့်တစ်ပါတည်းဖြစ်သော ပညာရေး၊ ကျန်းမာရေး၊ အာဟာရ၊ သောက်သုံး ရေ၊ မိလ္လာစနစ်နှင့် တစ်ကိုယ်ရေးသန့်ရှင်းရေးအစီအစဉ် (WASH)၊ ကလေးသူငယ်အကာအကွယ်ပေးရေး စသည့် ကဏ္ဍများရှိ နည်းစနစ်များကို အားကောင်းခိုင်မာစေပြီး ဗဟိုချုပ်ကိုင်မှုကင်းလွတ်ခြင်းနှင့် လူ့ဘောင် တည်ငြိမ်မှုကို မြှင့်တင်ရေး လိုအပ်ချက်များမှ ရရှိလာသည့် အခွင့်အလမ်းများ အပါအဝင် အထက်ပါ ကဏ္ဍများကို အခြေခံလူတန်းစားများ ရရှိလက်လှမ်းမီနိုင်စေရေး အလေးပေး ပံ့ပိုးလျက်ရှိပါသည်။ ကလေးများအတွက် ဘဏ္ဍာငွေနှင့် စီမံကိန်းများကို အကောင်အထည်ဖော် ဆောင်ရွက်ရေးနှင့် ဖွံ့ဖြိုးတိုးတက်မှု ရှိစေရေးအတွက် နိုင်ငံအဆင့်၊ ပြည်နယ်အဆင့်နှင့် မြို့နယ်အဆင့်များတွင် စွမ်းဆောင်ရည် မြှင့်တင်ခြင်း လုပ်ငန်းများကို ပံ့ပိုးဆောင်ရွက်ပေးပါသည်။

ပဋိပက္ခနှင့် သဘာဝဘေးဒဏ် ခံစားရသည့် ကလေးငယ်တို့၏ လိုအပ်ချက်များ၊ ကြိုတင် ပြင်ဆင်မှု များတွင် ရင်းနှီးမြှုပ်နှံခြင်း၊ ဆင်းရဲနွမ်းပါးသည့် ကလေးငယ်များကို ဦးစားပေးသည့် ဘေးအန္တရာယ် ထိခိုက်သက်သာစေရေးနှင့် ကြံ့ကြံ့ခံနိုင်ရေး နည်းဗျူဟာများ စသည်တို့အပေါ် နိုင်ငံတော်အစိုးရ၏ တုံ့ပြန် ဖြေရှင်းမှုများတွင်လည်း ပံ့ပိုးပေးပါသည်။ ကဏ္ဍစုံပြုပြင်ပြောင်းလဲမှုများတွင် လက်ရှိ ပူးပေါင်းဆောင်ရွက်မှု အရှိန်အဟုန်မှာ ဆက်လက်ရွေ့လျားနေမည်ဖြစ်ပြီး ကလေးသူငယ် အခွင့်အရေးများ လျင်လျင်မြန်မြန်၊ ကျယ်ကျယ်ပြန့်ပြန့် ရရှိနိုင်မည့် ဥပဒေနှင့် မူဝါဒများ ဖွံ့ဖြိုးလာစေရန် အထောက်အပံ့များ ဆက်လက် ပံ့ပိုး ပေးနေမည်ဖြစ်ပါသည်။ ကုလသမဂ္ဂကလေးသူငယ်များ ရန်ပုံငွေအဖွဲ့သည် ဆုံးဖြတ်ချက် ချမှတ်သူများနှင့် အခြားသက်ဆိုင်ရာ အားပေးထောက်ခံသူများအပေါ် လွှမ်းမိုးမှုရှိသည့် အလုံးစုံစည်းရုံးလှုံဆော်မှု မဟာဗျူဟာ (Comprehensive Advocacy Strategy)ကို စနစ်တကျ အကောင်အထည်ဖော် ဆောင်ရွက်လျက်ရှိပါသည်။

၂၀၁၄-၂၀၁၇ ကာလအပိုင်းအခြားအတွက် ကုလသမဂ္ဂကလေးသူငယ်များ ရန်ပုံငွေအဖွဲ့သည် ဌာနတွင်း ဦးစားပေး လုပ်ဆောင်ချက် ၅ ရပ်ဖြစ်သည့်

၁။ ကလေးသူငယ်များအတွက် ပြည်သူ့ဘဏ္ဍာငွေ တိုးမြှင့်ရေး

၂။ ရခိုင်ပြည်နယ်ရှိ ကလေးများအားလုံးအတွက် လူ့အခွင့်အရေး တိုးမြှင့်အကာအကွယ်ပေးရေး

၃။ စစ်ဘေးသင့်ကလေးငယ်များ

၄။ ကလေးများ၏ ပထမဆုံးရက် (၁၀၀၀) ကာလ

၅။ မသန်စွမ်းသည့် ကလေးငယ်များ စသည်တို့ကို ဖော်ထုတ်သတ်မှတ်ခဲ့ပါသည်။

ကုလသမဂ္ဂကလေးများရန်ပုံငွေအဖွဲ့သည် အစိုးရအဖွဲ့အစည်းများ၊ နိုင်ငံတကာနှင့် ပြည်တွင်း အစိုးရ မဟုတ်သော အဖွဲ့အစည်းများ၊ ကိုးကွယ်မှုအခြေခံသည့် အဖွဲ့အစည်းများနှင့် နိုင်ငံအနှံ့အပြားတွင် တည်ရှိသည့် ၎င်းတို့၏ ရုံးနှင့် စခန်း ၁၀ ခုတို့ဖြင့် လုပ်ငန်းများကို တိုက်ရိုက် ကွင်းဆင်း အကောင်အထည်ဖော် လျက်ရှိပါသည်။ ယင်းလုပ်ငန်းများသည် ကလေးသူငယ် အခွင့်အရေးဆိုင်ရာ သဘောတူညီချက်နှင့် တွဲဆက်နေပြီး မည်သည့် အချိန်တွင်မဆို လူမျိုး၊ မျိုးနွယ်စု၊ မိဘနှစ်ပါး၏ နိုင်ငံသားဖြစ်မှု၊ လူမှုစီးပွားအခြေအနေနှင့် စွမ်းဆောင်ရည် တို့ကို ထည့်သွင်းမစဉ်စားဘဲ နေရာအနှံရှိ ကလေးငယ်တိုင်း အခွင့်အရေးပြည့်ပြည့်ဝဝ ရရှိစေရေးကိုသာ ဆောင်ရွက်ခြင်းဖြစ်ပါသည်။

United Nations Children's Fund

အကြောင်း

Financials