GIZ အဖွဲ့သည် ဂျာမနီနိုင်ငံတစ်ဝှမ်းတွင်သာမက ကမ္ဘာတစ်လွှား နိုင်ငံပေါင်း ၁၃၀ ကျော်တွင် လုပ်ငန်းများ လည်ပတ်ဆောင်ရွက်လျက်ရှိပြီး နိုင်ငံရေး၊ စီးပွားရေး နှင့် လူမှုပြုပြင် ပြောင်းလဲရေး လုပ်ငန်းစဉ်များအတွက် အသုံးဝင်ထိရောက်၍ ရေရှည်တည်မြဲသည့် ဖြေရှင်းချက်များကို ရှာဖွေဖော်ထုတ်ပေးနေသည့် ဂျာမနီဖက်ဒရယ် ပြည်ထောင်စု အစိုးရပိုင် စီးပွားရေးလုပ်ငန်းတစ်ခု ဖြစ်ပါသည်။ ၎င်း၏ လုပ်ငန်းအများစုကို ဂျာမနီဖက်ဒရယ် ပြည်ထောင်စု၊ စီးပွားရေး ပူးပေါင်း ဆောင်ရွက်ရေးနှင့် ဖွံ့ဖြိုးတိုးတက်ရေး ဝန်ကြီးဌာန (BMZ) က တာဝန်ပေးအပ်ထားပါသည်။ သို့သော်လည်း GIZ အဖွဲ့သည် အခြား ဂျာမန်ဝန်ကြီး ဌာနများ ၊ အစိုးရပိုင်နှင့် ပုဂ္ဂလိက အဖွဲ့အစည်းများ၏ ကိုယ်စား ဂျာမနီနိုင်ငံတွင်သာမက နိုင်ငံရပ်ခြား တွင်ပါ လုပ်ငန်းများ ဆောင်ရွက်လျက်ရှိရာ ပါဝင်သည့်အဖွဲ့အစည်းများမှာ အခြားနိုင်ငံ့ အစိုးရများ၊ ဥရောပကော်မရှင်ကဲ့သို့ ဥရောပသမဂ္ဂ အဖွဲ့အစည်းများ ၊ ကုလသမဂ္ဂ နှင့် ကမ္ဘာ့ဘဏ်တို့ ဖြစ်ပါသည်။ GIZ ၏ လုပ်ငန်းအများစုသည် မြန်မာနိုင်ငံကဲ့သို့ ဖွံ့ဖြိုးစ ဈေးကွက်ရှိ ပြည်သူများ၏ အနာဂတ်ကို ၎င်းတို့ ကိုယ်တိုင် ပုံဖော်နိုင်ရန် နှင့် လူနေမှုအဆင့်တန်း မြှင့်တင်နိုင်ရေး အကူအညီပေးရန် အဓိကထားပါသည်။ ၂၀၁၂ခုနှစ်တွင် မြန်မာနိုင်ငံသို့ ပြန်လည်ရောက်ရှိပြီးသည့်နောက်ပိုင်း ဦးဦးဖျားဖျား စီးပွားရေး ရေရှည်ဖွံ့ဖြိုး တိုးတက်မှုကို အဆင်မြှင့်တင်ခြင်းဖြင့် ဖွဲ့အစည်းများ၊ လူ့စွမ်းအားအရင်းအမြစ်၊ မူဝါဒရေးရာနှင့် အခြေခံအဆောက်အအုံတို့ နှင့်သက်ဆိုင်သော ရေရှည်တည်မြဲစေရုံ သာမက လူမှုရေးအရလည်း အားလုံးပါဝင်နိုင်သည့် စီးပွားရေးအဆောက်အအုံ ဖြစ်ပေါ် ဖွံ့ဖြိုးလာစေရေးအတွက် မူဘောင်ဆိုင်ရာ အခြေအနေများကို ပိုမိုတိုးတက် ကောင်းမွန်စေရန် အလေးပေး ဆောင်ရွက်လျက်ရှိပါသည်။ BMZ ၏ ကိုယ်စား GIZ အဖွဲ့သည် ၎င်း၏ ညီအမအဖွဲ့အစည်းတစ်ခုဖြစ်သည့် KfW နှင့် အနီးကပ်ပူးပေါင်းဆောင်ရွက်၍ မြန်မာ့စီးပွားရေး ကို ပိုမို ယှဉ်ပြိုင်မှုအားကောင်းလာစေရန် စီးပွားရေး ရေရှည်တည်တံ့ ဖွံ့ဖြိုးစေရေး အကူအညီများကို မဏ္ဍိုင်သုံးရပ်တွင် ပံ့ပိုးပေးနေခဲ့ပါသည်။

ပုဂ္ဂလိကကဏ္ဍကို အားကောင်းလာစေရန်ဆောင်ရွက်ခြင်း။

• အသေးစားနှင့် အလတ်စား စီးပွားရေး လုပ်ငန်းများသည် စီးပွားရေးတည်ငြိမ်မှုရှိရန် အဓိကနေရာမှ အထောက်အကူ ပြုနေပါသည်။ ၎င်းတို့ကို ဖွံ့ဖြိုးလာစေရန်အလို့ငှာ GIZ သည် ဝန်ကြီးဌာနများ၊ ကုန်သည်ကြီးများအဖွဲ၊ စီးပွားရေးအဆင့်မြှင့်တင်ရေး အတိုင်းအတာများကို ဖော်ဆောင်နေသည့် အဖွဲ့အစည်းများနှင့်အတူ လုပ်ငန်းများ ဆောင်ရွက်လျက်ရှိပါသည်။ စီးပွားရေးလုပ်ငန်းတစ်ခု စတင်လည်ပတ်ရာတွင် သီးသန့်အကြံပေးဝန်ဆောင်မှုများနှင့် သင်တန်းများကို ပံ့ပိုးပေးခြင်းဖြင့် အသေးစား နှင့် အလတ်စား စီးပွားရေးလုပ်ငန်းများ၏ လိုအပ်ချက်များကို အလေးထား ဖြည့်ဆည်းပေးနေပါသည်။ အလားတူစွာ ဥရောပသမဂ္ဂနှင့် ပူးပေါင်းဆောင်ရွက်သည့် တွဲဖက်ရန်ပုံငွေထောက်ပံ့မှုအောက်တွင် နိုင်ငံတကာ ကုန်သွယ်မှု စနစ် ဆီသို့ မြန်မာနိုင်ငံအနေဖြင့် ဆက်လက် ပါဝင်နိုင်ရန်၊ ကမ္ဘာ့တန်ဖိုး ကွင်းဆက်အတွင်း ပူးပေါင်း ပါဝင်မှု တိုးမြှင့်ရန်၊ နိုင်ငံတကာ ကုန်သွယ်မှု ဆက်သွယ်ရေးကို (အထူးသဖြင့် ဥရောပသမဂ္ဂ အဖွဲ့နှင့်) ပိုမိုကောင်းမွန်စေရန် ရည်ရွယ်သည့် ကုန်သွယ်မှုဖွံ့ဖြိုး တိုးတက်ရေးစီမံချက်ကိုလည်း အကောင်အထည်ဖော်ဆောင်ရွက်လျက်ပါသည်။

ဘဏ္ဍာရေးကဏ္ဍကို ဖွံ့ဖြိုးတိုးတက်စေရန်ဆောင်ရွက်ခြင်း။

• စီးပွားရေးအဆောက်အအုံတစ်ခုသည် ငွေကြေးအရင်းအမြစ်မရှိပါက လုပ်ငန်း မည်သို့မျှ ဆောင်ရွက်နိုင်မည် မဟုတ်ပေ။ ငွေကြေးစျေးကွက်တည်ငြိမ်ခြင်းနှင့် အများတတ်နိုင်သည့် ငွေကြေးဝန်ဆောင်မှုများမှာ မရှိမဖြစ်လိုအပ်သည့် အရာများဖြစ်ပါသည်။ နိုင်ငံများအနေဖြင့် အသေးစား နှင့် အလတ်စား စီးပွားရေးလုပ်ငန်းများအတွက် ဝယ်လိုအား အရင်းတည် ငွေကြေးဝန်ဆောင်မှုများကို ဖွံ့ဖြိုးတိုးတက်စေမည့် စည်းမျဉ်းဥပဒေများ၊ အဆိုပါ ဝန်ဆောင်မှုများ ကို ပံ့ပိုးပေးနိုင်သည့် ဘဏ်များ နှင့် အဆိုပါဘဏ်များ လိုက်နာကျင့်သုံးရမည့် ငွေစာရင်းဆိုင်ရာစံနှုန်းသတ်မှတ်ချက်များ စသည်တို့ကို လိုအပ်ပါသည်။ GIZသည် မိတ်ဖက်အဖွဲ့များနှင့် ပူးပေါင်းကာ အဆိုပါကိစ္စရပ်များအားလုံးကို ဖြေရှင်းဆောင်ရွက်လျက်ရှိပါသည်။ အဆိုပါ နည်းလမ်းသည် ငွေကြေးဆိုင်ရာထုတ်ကုန်ကောင်း (Good Financial Product) တို့၏အကူအညီဖြင့် ကုမ္ပဏီများကို ရေရှည်တည်တံ့ ဖွံ့ဖြိုးစေရန် အခွင့်အလမ်းကို ပေးစွမ်းနိုင်သည့် တစ်ခုတည်းသော နည်းလမ်းဖြစ်ပါသည်။

နည်းပညာနှင့် သက်မွေးပညာလေ့ကျင့်သင်ကြားမှုကို မြှင့်တင်ဆောင်ရွက်ခြင်း။

• ထိုကဲ့သို့ အဖွဲ့အစည်းဆိုင်ရာတိုးတက်မှုများ နေသားတကျ ရှိလာသည် နှင့်အမျှ လူ့အရင်းအမြစ်သည် အမြဲလိုလို အဓိကကျသည့် အခန်းကဏ္ဍမှပါဝင်လာသည်။ အရည်အချင်း ပြည့်ဝသည့် ဝန်ထမ်းများထားရှိရန် အလွန်ပင် အရေးကြီးပါသည်။ မိတ်ဖက်များနှင့် ပူးပေါင်းဆောင်ရွက်၍ GIZ သည် ဝယ်လိုအားဗဟိုပြု နည်းပညာနှင့် သက်မွေး ပညာ လေ့ကျင့်သင်ကြားပေးခြင်း စီမံချက်များကို ပြုစုရေးဆွဲလျက်ရှိပါသည်။ ယင်းစီမံချက်ကို စက်မှုလုပ်ငန်းများနှင့် အနီးကပ်ပူးပေါင်းဆောင်ရွက်ရာတွင် စမ်းသပ် ဆောင်ရွက်နေပြီး နိုင်ငံတော်မူဝါဒများ၊ မဟာဗျူဟာများ နှင့် မူဘောင်များဆီသို့ စီးဝင်သွားမည်ဖြစ်ပါသည်။ ထိုအခါ ကျွမ်းကျင် အလုပ်သမားစျေးကွက်တွက် လုပ်သားအရေအတွက် တိုးပွားလာ မည်ဖြစ်ပါသည်။ ၂၀၁၅ခုနှစ်တွင် ကျေးလက်ဖွံ့ဖြိုးရေး လုပ်ငန်းများတွင် ပံ့ပိုးပေးခြင်းဖြင့် GIZ သည် ဂျာမန်-မြန်မာ ဖွံ့ဖြိုးမှုပူးပေါင်းဆောင်ရွက်ရေးလုပ်ငန်း၏ ဒုတိယဦးစားပေးအနေဖြင့် ကျေးလက်ဖွံ့ဖြိုးရေး လုပ်ငန်းများကို တိုးချဲ့ဆောင်ရွက်ခဲ့ ပါသည်။ ရှမ်းပြည်နယ်တွင် အဓိကထား လုပ်ဆောင်သည့် လက်ရှိလုပ်ငန်းများမှာ စိုက်ပျိုးရေး တန်ဖိုးကွင်းဆက်ကို ရာသီဥတု ပြောင်းလဲမှုနှင့် လိုက်လျော ညီထွေရှိစေရေး၊ အစာအဟာရဘေးကင်းစိတ်ချရမှု ပိုမိုရရှိစေရေး၊ ကျေးလက်ဒေသ လျှပ်စစ်မီးရရှိရေး နှင့် ဘိန်းအစားထိုးစိုက်ခင်းများ စိုက်ပျိုးမှုကို မြှင့်တင် ပေးရေးစသည့် တို့ကို ဖြစ်ပါသည်။ ၂၀၁၆ ခုနှစ်ကာလတွင် ရေရှည်တည်မြဲသည့် စိုက်ပျိုးရေး သာမက ရေသတ္တဝါနှင့် အပင်များ မွေးမြူရေးကဏ္ဍတွင် ထပ်တိုးလုပ်ငန်းများကို စတင်ဆောင်ရွက်မည်ဖြစ်ပါသည်။ ထပ်မံ၍ ရခိုင်ပြည်နယ်တွင် အစားအစာ ဘေးကင်းရေးနှင့်ဆိုင်သည့် နောက်တိုးစီမံကိန်းများကို ဆောင်ရွက်ရန် စီမံထားပါသည်။

ရှမ်းပြည်နယ်တွင် စိုက်ပျိုးရေးတန်ဖိုးကွင်းဆက်ကို ရာသီဥတုအပြောင်းအလဲနှင့်အညီ လိုက်လျောညီထွေ ပြောင်းလဲရေး

• ရာသီဥတုအပြောင်းအလဲကြောင့် ဖြစ်ပေါ်လာနိုင်သည့် အကျိုးသက်ရောက်မှုများ နှင့်အညီ စိုက်ပျိုးရေးကဏ္ဍကို လိုက်လျောညီထွေပြောင်းလဲနိုင်မှုသည် ကျေးလက်ဒေသများ ဆက်လက်ရပ်တည်နိုင်ရေးကို အဆုံးအဖြတ်ပေးနေပါသည်။ ၄၀ ရာခိုင်နှုန်းခန့် သော ကျေးလက်ပြည်သူများ ဆင်းရဲချို့တဲ့စွာ နေထိုင်ကြသည့် ရှမ်းပြည်နယ်မှာ သာမန်ထက်ပို၍ အားနည်းထိခိုက်လွယ်ပါသည်။ ပုဂ္ဂလိကအဖွဲ့၊ အစိုးရအဖွဲ့၊ နိုင်ငံတကာမိတ်ဖက်များနှင့် ပူးပေါင်းဆောင်ရွက်၍ GIZ သည် ရာသီဥတုအပြောင်းအလဲကြောင့်ပေါ်ပေါက်လာသည့် ဘေးအန္တရာယ်များကို ကျော်လွှားနိုင်ရန် ရွေးချယ်ထားသည့် စိုက်ပျိုးရေး တန်ဖိုးကွင်းဆက်နှင့် ကျွဲကူးရေပါ ဖြစ်သော စီးပွားရေးလုပ်ငန်းများ ဖြစ်ပေါ်လာစေရန် ရည်ရွယ် လုပ်ဆောင်နေ ပါသည်။

ရှမ်းပြည်နယ်အရှေ့ပိုင်းတွင် အစာအဟာရ ဘေးကင်းလုံခြုံစေရေး

• အစားအစာ ဘေးဖြစ်ခြင်းနှင့် အဟာရချို့တဲ့ခြင်းများ မှာ ရှမ်းပြည်နယ်အရှေ့ပိုင်းရှိ အားနည်းချို့တဲ့ပြီး နွမ်းပါးလှသည့် ကျေးလက်ဒေသနေပြည်သူများ အတွက် စိန်ခေါ်မှုတစ်ရပ် အဖြစ်ရှိနေပါသေးသည်။ အဟာရချို့တဲ့မှုနှင့် ကလေးသူငယ် သေဆုံးမှုနှုန်းမြင့်မားမှု ဒဏ်ကို အများဆုံးခံရသူများမှာ အမျိုးသမီးများနှင့် ကလေးငယ်များဖြစ်ပါသည်။ အဟာရချို့တဲ့ရခြင်း အကြောင်းအရင်းမှာ အများအပြားရှိပါသည်။ ၎င်းကို တိုက်ဖျက်ရန်အတွက် ကဏ္ဍစုံ၊ အဆင့်စုံ ချဉ်းကပ်ဖြေရှင်းနည်းကို ဆောင်ရွက်ရန် လိုအပ်ပါသည်။ အစာအဟာရ၊ အဟာရဆိုင်ရာ ကျန်းမာရေး နှင့် သောက်သုံးရေ၊ မိလ္လာစနစ် နှင့် တစ်ကိုယ်ရေ သန့်ရှင်းရေး အစီအစဉ် (WASH) စသည့် အပြန်အလှန်ချိတ်ဆက်နေသည့် ကဏ္ဍ သုံးခုကို GIZ ၏ စီမံကိန်းများက ဖြေရှင်း ဆောင်ရွက်သွားမည်ဖြစ်ပါသည်။

မြန်မာနိုင်ငံရှိ ကျေးလက်ဒေသများ လျှပ်စစ်ဓာတ်အားတိုးမြှင့် ရရှိရေး

• ကျေးလက်ဒေသ များတွင် စီးပွားရေးနှင့် လူမှုဘဝများ ဖွံ့ဖြိုးတိုးတက်ရေးအတွက် မျက်မှောက်ခေတ်စွမ်းအင်ဝန်ဆောင်မှုများကို ရရှိလက်လှမ်းမီမှုသည် အဓိက အရေးပါ ပါသည်။ လျှပ်စစ်မီးအားတည်ငြိမ်မှုမရှိခြင်းသည် စီးပွားရေးလုပ်ငန်းများအတွက် အကြီးအမားဆုံး အခက်အခဲတစ်ခုဖြစ်ပါသည်။ ၂၀၁၅ခုနှစ် အမျိုးသားလျှပ်စစ်ဓာတ်အားရရှိရေးစီမံကိန်း (NEP)သည် ဝေးလံခေါင်းဖျားဒေသများတွင် အမျိုးသားအဆင့် ဓာတ်အားလိုင်း မသွယ်တန်း ရသေးမီ ဓာတ်အားလိုင်း အသေးသွယ်တန်းခြင်းကို စိတ်ချရပြီး အများတတ်နိုင်သည့် စွမ်းအင်ဖြန့်ဖြူး ပေးသည့် လတ်တလော ဖြေရှင်းနည်းအဖြစ် အသိအမှတ်ပြုပါသည်။ အမျိုးသား လျှပ်စစ်ဓာတ်အားရရှိရေးစီမံကိန်းကို ပံ့ပိုးပေးရာတွင် နိုင်ငံတော်အစိုးရကို ဓာတ်အားလိုင်း အသေးသွယ်တန်းခြင်း၌ ပုဂ္ဂလိကကဏ္ဍအပိုင်းမှ ရင်းနှီးမြှုပ်နှံလာစေရန် နိုင်ငံရေးနှင့် စည်းမျဉ်းမူဘောင်ကို မည်ကဲ့သို့ သတ်မှတ်မည်ဆိုသည်နှင့် ပတ်သက်၍ အကြံဉာဏ်များပေးခြင်း၊ အစိုးရဝန်ထမ်းများနှင့် ပုဂ္ဂလိက ကုမ္ပဏီများကို ရှမ်းပြည်နယ်အတွင်း တွင် ခိုင်မာတိကျသည့်ကနဦး စမ်းသပ်စစ်ဆေးမှုများ မည်ကဲ့သို့ ဆောင်ရွက်မည်၊ ဓာတ်အားလိုင်း အသေးသွယ်တန်းခြင်းနှင့်ပတ်သက်၍ မည်ကဲ့သို့ စီမံကိန်းချမည်၊ အကောင်အထည်ဖော်လုပ်ဆောင်မည်၊ ကြီးကြပ်ကွပ်ကဲမည် စသည်တို့ကို သင်တန်းများ ပေးခြင်းဖြင့် ပံ့ပိုးပေးပါသည်။ BMZ က တာဝန်ပေးအပ်သည့် စီမံကိန်းများ အပြင် အခြားလုပ်ငန်းများဖြစ်သည့် မြန်မာ့ရဲတပ်ဖွဲ့ကို ပြုပြင်ပြောင်းလဲပေးမည့် ဥရောပသမဂ္ဂ ရန်ပုံငွေထောက်ပံ့သည့် အစီအစဉ်၏ အစိတ်အပိုင်းတစ်ရပ်အနေဖြင့် အရပ်ဘက် လူမှုအဖွဲ့အစည်းများနှင့် မီဒီယာများကို ရဲတပ်ဖွဲ့နှင့် ကူးလူးဆက်ဆံခြင်း၊ ချိတ်ဆက် ဆောင်ရွက်ခြင်းများ တိုးမြှင့်လာစေရန်ကို လည်း ဆောင်ရွက်လျက်ရှိပါသည်။ စီမံကိန်းကာလ သည် ၂၀၁၅ခုနှစ် စက်တင်ဘာလတွင် ကုန်ဆုံးခဲ့ပြီးဖြစ်ပါသည်။ လုပ်ငန်းပြီးစီးမှု တိုင်းတာချက်များကိုမူ ဆောင်ရွက် နေဆဲဖြစ်ပါသည်။

Deutsche Gesellschaft für Internationale Zusammenarbeit

About

Financials